सर्वविदितै कुरा हो, जलवायु परिवर्तनले विश्वभर नै असर पारिरहेको छ । त्यहीक्रममा पछिल्लो समय त्यसको असर अंगुर उत्पादनमा चरम रुपमा परेको छ र साथै त्यसले विश्वकै वाइन उद्योगहरुले यस अघि कहिल्यै अनुभव नगरेको समस्यामा पारेको छ । त्यो समस्या हो-स्वादको समस्या ।

हो, स्वादको समस्या ।

जलवायु परिवर्तनको कारण वाइनको स्वादमा समस्या सृजना भएको छ र त्यसलाई मिलाउन वाइन उद्योगहरुलाई हम्मेहम्मे परिरहेको छ । धेरै ग्राहकले ‘वाइनको स्वाद किन फेरिएको छ, के त्यसमा गलत खाद्य पदार्थको मिसावट गरिएको त छैन ?’ भन्दै प्रश्न गरिरहेका छन् । र, त्यो प्रश्नको चित्तबुझ्दो जवाफ दिन नसक्दा वाइन उद्योगहरु हैरान भएका छन् । किनकी जलवायु परिवर्तनको कारण अंगुरमा आएको परिवर्तनको असर वाइनको स्वादमा परिरहेको भन्दा धेरैले पत्याउँदैनन् । उद्योगले नै नियोजित रुपमा कुनै पदार्थ मिसावट गरेको आंशका उनीहरुमा रहेको हुन्छ । तर, वास्तविकता भने फरक छ ।

वाइनको मुख्य कच्चा पदार्थ अंगुर हो । विश्वभरको जलवायु परिवर्तन अर्थात तापक्रम वृद्धिले अंगुरको समग्र उत्पादन प्रकृया नै परिवर्तन गरेको छ । अंगुरको स्वादमै पनि परिवर्तन ल्याएको छ । त्यसको असर वाइनमा परेको छ ।

उदाहरणको लागि क्यालिफोर्नियाको प्रसिद्ध नापा उपत्यका क्षेत्रमा रहेको केन भाइनयार्ड एण्ड वाइनरीमा वाइन बनाउने काम गर्ने (वाइन मेकर) क्रिस होवेलको भनाइलाई लिन सकिन्छ । सन् १९९१ देखि वाइन मेकरको काम गरिरहेका उनी बढ्दो तापक्रमका कारण वाइनको स्वाद व्यवस्थापन गर्न निकै चुनौति भएको बताउँछन् । ‘जलवायु परिवर्तनले सृजना गरेको चुनौति यति कडा छ कि त्यसले समग्र वाइन उद्योगको भविश्य कसरी अगाडि बढ्ला भन्ने प्रश्न खडा गरेको छ,’ उनी भन्छन् ।

उनका अनुसार मौसम परिवर्तनको ‘प्यार्टन’ नै अन्त्यन्त जटिल बनेको छ,अंगुर उत्पादनको बेला कहिले गर्मी हवात्तै बढ्छ र ५० डिग्रीको हाराहारीमा पुग्छ, कहिले गर्मी हवात्तै घटेर तल झर्छ । यो समयमा यति गर्मी हुन्छ भन्नै नसकिने भयो, त्यसले अंगुर उत्पादनको प्रकृयामै असर पारिरहेको छ । जब अंगुर उत्पादनको प्रकृया, फलको आकार र स्वादमा फरक पर्छ, वाइन उद्योग सोझै प्रभावित हुन्छ ।

अहिले त्यही भइरहेको छ ।

बढ्दो गर्मीको अर्काे खतरा आगलागी हो । अमेरिकाकै अंगुर उत्पादनको ‘हब’ मानिने नापा उपत्यकामा सन् २०१७ मा अंगुर फार्महरुमा भएको आगोलागीले धेरैवटा फार्महरु ध्वस्त भएका थिए, त्यसको असर त्यो वर्ष मात्र नभएर अर्काे वर्ष पनि परेको थियो । अर्काे वर्ष अर्थात् सन् २०१८ र २०१९मा फलेका अंगुरहरुमा समेत धुँवाको गन्ध आइरहेको थियो । त्यसको असर वाइन उद्योगहरुमा पनि पर्यो । तिनीहरुको गन्ध पनि कुनै वस्तु डढेको जस्तो आइरहेको थियो ।

जलवायु परिवर्तनले वाइन उद्योगहरुमा परेको यस्तो असर केवल अमेरिकामा मात्र छैन,विश्वमै वाइनको राजधानी मानिने ‘फ्रान्स’देखि इटाली, अर्जेण्टिनादेखि अष्ट्रियासम्मका वाइन उद्योगहरुमा परिरहेको छ । त्यसो भन्नुको अर्थ विश्वकै वाइन उद्योगहरु यतिबेला जलवायु परिवर्तनले सृजना गरेको ‘स्वादको लडाई’मा परिरहेका छन् । यसबाट उनीहरु कसरी निस्केलान् वा उपभोक्ताहरु नै जर्वजस्त रुपमा वाइनको ‘मन नपरेको स्वाद’मा अभ्यस्त होलान् वा विश्वमा वाइनको खपतमै कमी आउला ? यस्को जवाफ भने अहिलेलाई कसैसँग छैन ।