गुरागाईले हाजिर गर्ने दिन र शुक्रबार कार्यालयमा उपस्थित नभएका मेयर साह सोमबारदेखि कार्यालय गइरहेका छन् । तर, यो बीचमा उनले उपमेयर सुनिता डंगोल, प्रशासकिय अधिकृत गुरागाई र जनप्रतिनिधहरुसंग भेटघाट गरेका छैनन् । डंगोल अहिले देश बाहिर छन् भने गुरागाईसंग उनले एक पटक पनि भेटेका छैनन् । गुरागाईले पनि वास्ता गरेका छैनन् ।
स्रोतका अनुसार विहीबारको घटनापछि ‘शोकमा परेजस्तै’ भएका बालेन आफ्ना पिए भूपदेव साहमाथि भ्रष्टाचारको आरोप लगाउंदै कर्मचारीहरुले वर्खास्त गर्न दबाब दिएपछि थप मर्माहत भएका छन् । कर्मचारीहरुले भूपदेवलाई नहटाए मेयरको कुनै पनि आदेश पालना नगर्ने चेतावनी दिएका छन् ।
त्यस्तै कानुन विपरित गएर मेयर बालेनले महानगरका प्रहरी परिचालन गरेको भन्दै व्यापक विरोध भइरहेको छ । महानगरमा बालेनको सबैभन्दा बलियो दस्ता मानिएको महानगर प्रहरी प्रमुख राजु पाण्डे आफूमाथि कारवाही हुने अवस्था आएपछि अहिले प्रशासकिय अधिकृत गुरागाईसंग हारगुहार गरिरहेको कर्मचारीहरु बताउंछन् । कानुन अनुसार महानगरको प्रहरी परिचालनको जिम्मेवारी पाएर प्रमुख प्रशासकिय अधिकृत गुरागाईले विहीबार हाजिर गर्ने क्रममा आफूमाथि ज्यादती गरेका पाण्डेमाथि अहिलेसम्म कुनै कारवाही प्रकृया शुरु गरेका छैनन् ।
‘शायद उहाँ मौकाको पर्खाइमा हुनुहुन्छ वा पाण्डेलाई नै हात लिएर मेयर बालेनलाई थप कमजोर बनाउन सकिन्छ भन्ने बारेमा केही सोचिरहनु भएको हुनसक्छ’ महानगरका एक उच्च अधिकारी भन्छन् । उनका अनुसार भोलिका दिनमा गुरागाई संगको सम्वन्ध जसरी अगाडि बढे पनि मेयर बालेन पहिले जस्तो आक्रामक हुने सम्भावना भने लगभग सकिएको छ । ‘राजीनामा दिएर भिड्छु भन्ने मुर्खता गर्ने हो भने अलग कुरा अन्यथा विहीबारको घटना र त्यसयता उनको मौनता हेर्दा अब पहिलेका र अबका मेयर बालेनमा आकासपातालको फरक हुने निश्चित छ,’ उनले भने ।
