बिहीबार बजार १२.३८ अंकले घटेर २६६९.७६ विन्दुमा झरेको छ भने ४ अर्ब ५६ करोड रुपैयाँभन्दा बढीको शेयर खरिदबिक्री भएको छ । बजार सूचकसँगै कारोबार रकम समेत सुस्ताएको छ । लगानीकर्ता ‘पर्ख र हेर’ को अवस्थामै छन्। अनुभवी लगानीकर्ता पनि बजारको विषयमा आँकलन गर्न सकिरहेका छैनन् । बजार बढ्ने आशामा रहेका लगानीकर्ता दिन प्रतिदिन झन् झन् निरास बन्नुपर्ने अवस्था सिर्जना भएको छ ।
मुलुकमा देखिएको राजनीतिक अस्थिरताको प्रभाव बजारमा परेको लगानीकर्ता आदित्य शिवाकोटीको बुझाई छ । तर बजारमा भएको तरलताको अवस्था राम्रो हुँदासम्म डराउनु पर्ने अवस्था नरहेको शिवाकोटीको बुझाई छ ।
अकोतर्फ लगानीकर्ताले नाफा बुक गर्न नजान्दा पनि गुमाउनु परेको छ । सचेत लगानीकर्ताले यही मार्केटबाट पनि कमाएका छन् । ‘दोस्रो बजार भनेको त्रिशुली हो । त्यहा जत्रो भाँडो ल्याएको उति लैजाने हो । धेरै खोजेर त्रिशुली खोलामा भित्र गए भाँडोसहित डुब्ने डर हुन्छ’ शिवाकोटीले भने ।
