शेरचन हालै सम्पन्न भएको मदन भण्डारी फाउण्डेशनको चौथो राष्ट्रिय सम्मेलनबाट केन्द्रीय सदस्य बनेका छन् । फाउण्डेशन नेकपा एमालेको ‘भातृ संगठन जस्तै’ संस्था हो । त्यसलाई औपचारिकरुपमा भातृ संस्थाको मान्यता नदिए पनि एमालेले सुभेच्छुक संस्थाकोरुपमा मान्यता दिएको छ । संस्थामा नेकपा एमालेका सदस्यहरुमात्र आवद्ध छन् ।
पूर्व राष्ट्रपति तथा नेकपा एमालेका स्वर्गिय महासचिव मदन भण्डारीकी पत्नी विद्या भण्डारी संरक्षक रहेको फाउण्डेशनको अध्यक्षमा उनकी छोरी उषाकिरण दोस्रोपटक अध्यक्ष बनेकी छन् । सम्मेलनको उद्घाटन एमाले अध्यक्ष तथा प्रधानमन्त्री केपी शर्मा ओलीले गरेका थिए ।
शेरचनले बैंकको जागिरबाट अवकाश पाएपछि आफू राजनीतिमा जानसक्ने आफू निकटस्थहरुलाई बताउंदै आएका थिए । त्यहीअनुसार उनले फाउण्डेशनको राजनीतिमार्फत एमालेको राजनीतिमा कदम चालेको जानकारहरु बताउंछन् । वाग्लुङ जन्मथलो भएका शेरचन पहिलेदेखि एमालेको शुभचिन्तक भए पनि कुनै कमिटीमा औपचारिकरुपमा बसेका थिएनन् भने खुलेर पनि लागेका थिएनन् । तर, अहिले भने उनी खुल्लारुपमा एमालेको राजनीतिमा लागेका छन् । त्यहीआधारमा उनी गभर्नरको दौडमासमेत रहेको चर्चा बैंकिङ क्षेत्रमा चलिरहेको छ ।
प्रभु बैंकका अध्यक्ष देवी भट्टचन पनि एमालेबाट समानुपातिक तर्फबाट संघीय सांसद छन् । पहिले कांग्रेस रहेका भट्टचनलाई नेपाली कांग्रेसले समानुपातिकबाटै सांसद बनाउने तयारी गरे पनि अन्तिम समयमा उनी एमालेको सदस्यता लिएर सांसद भएका थिए । उनलाई एमाले र सांसद बनाउन शेरचनको हात रहेको चर्चा त्यतिबेला चलेको थियो ।
नेपालमा निजी क्षेत्रको बैंक तथा वित्तीय संस्थाको उच्च तहमा पुगेका व्यक्तिले पार्टी राजनीति गरेको घटना विरलै छ । त्यस्तो गर्ने शेरचन संभवतः दोस्रो व्यक्ति हुन् ।
यसअघि नबिल बैंकको सिईओबाट अवकाश पाएर राष्ट्रिय स्वतन्त्र पार्टी (रास्वपा)को केन्द्रीय सदस्य र प्रशिक्षण विभागको प्रमुख बनेका शाह अहिले राजनीतिबाट विरक्तिएका छन् । उनले पार्टी छोडेको घोषणा नगरे पनि पार्टीमा निस्कृय रहेको र आफू कुनै जिम्मेवारीमा नबस्ने जानकारी पार्टी नेतृत्वलाई दिइसकेको बताइएको छ । ‘बैंक चलाउनु र पार्टी राजनीति गर्नु फरक रहेछ । मैले सोंचे जस्तो पार्टी नहुने भएपछि बसिरहनु ठीक छैन’ उनले आफू निकटहरुलाई भन्ने गरेका छन् ।
यसरी शाह पार्टी राजनीतिबाट विरक्त भइरहदा शेरचनको राजनीतिक भविश्य कस्तो रहला ? त्यो भने अहिल्यै भन्न सकिदैंन ।
