चालु आर्थिक वर्षको चैत मसान्तसम्ममा कम्पनीले बिक्रीमार्फत ५ अर्ब ४५ करोड ८१ लाख रुपैयाँ आम्दानी गरेको छ। यो गत आर्थिक वर्षको सोही अवधिको तुलनामा २४.७५ प्रतिशत कम हो। गत आर्थिक वर्षको सोही अवधिसम्ममा कम्पनीले बिक्रीमार्फत ७ अर्ब २५ करोड ३३ लाख रुपैयाँ आम्दानी गरेको थियो।
समीक्षा अवधिमा कम्पनीको खुद नाफा ५१.१५ प्रतिशत घटेको छ। गत आर्थिक वर्षको तेस्रो त्रैमाससम्ममा ६५ करोड ४८ लाख रुपैयाँ नाफा कमाएको यस कम्पनीले चालु आर्थिक वर्षको सोही अवधिसम्ममा ३१ करोड ९९ लाख रुपैयाँ मात्र नाफा कमाउन सफल भएको छ।
बिक्री आम्दानी घटेको र उत्पादन लागत बढेका कारण खुद नाफा घट्न पुगेको हो। महंगो बैंक ब्याजदर, तरलताको संकुचन, विश्व् बजारमा कोईला, डिजेल लगायतका सामानहरुको अत्याधिक मूल्य वृद्धिको प्रभाव, तेस्रो त्रैमास अवधिभर नेपाल विद्युत प्राधिकरणले उद्योगमा अघोषित लोडसेडिङ्ग गरेका कारण वैकल्पिक उर्जाको प्रयोगबाट उद्योग सञ्चालन गर्दा उत्पादन लागत बढ्न पुगेको कम्पनीले बताएको छ।
नाफासँगै कम्पनीको प्रतिशेयर आम्दानी पनि घटको छ। समीक्षा अवधिमा कम्पनीको यस्तो आम्दानी १० रुपैयाँ १५ पैसा घटेर ९ रुपैयाँ ६९ पैसा झरेको छ। चैत मसान्तसम्ममा कम्पनीको प्रतिशेयर नेटवर्थ २०६ रुपैयाँ ६४ पैसा रहेको छ भने मूल्य आम्दानी अनुपात ४१.७९ गुणा रहेको छ।
४ अर्ब ४० करोड रुपैयाँ चुक्ता पूँजी रहेको यस कम्पनीको शेयर प्रिमियमा ९५ करोड ६२ लाख रुपैयाँ र अन्य जगेडा कोषमा ३ अर्ब ७३ करोड ५८ लाख रुपैयाँ सञ्चित छ।
